الحمد لله كثير إني قريت هالكتاب.. ما أبالغ لو أقول حسيت إني أسلمت من جديد. قرأته وما كان في بالي إن ردة فعلي بتكون زي كذا أبدا أبدا أبدا .. بس العجيب من اول مابديت أقراه و أنا تغيرت.. حسيت بعار وفشل لأني فوق العشرين سنة مسلمة وفي بيئة مسلمة وما عمري فكرت تجاه الآيات زي ما فكّر جيفري. بس بالنهاية الحمد لله اللي ربي يسر لي أقرأ هذا الكتاب.. طول الـ 400 صفحة و أنا أقرأ و أفكر في نفس الوقت.. أسكر الكتاب واكتب ملاحظاتي الخاصة عن كل شيء تكلم عنه أو آية أوردها. عرفت اشياء كثيرة وتوضحت لي اشياء أكثر، زالت شكوك وتوسعت مداركي نحو فهم القرآن أكثر. أحسه داخل جواتي وعارف ان العقل أساس ضروري للإيمان وأنو تعطيل العقول يخالف فطرتنا البشرية ويخالف مبدأ استخلافنا في الأرض. نفسي أعطي الكتاب يقرأه كل شخص سلم بالأمور اللي نُقلت له بدون تفكير والمصيبة أنه يروج لها بدون اقتناع او حتى بون ما يشيك على عقله هل هو مقتنع عن عقل وقلب او مقتنع لأنه هذا الموروث بس ؟ عني ! أعتبر هذا الكتاب من أفضل الكتب اللي قرأتها وبقرأها .. بالنسبة لي أفضل من كتب المواعظ والخطب لأننا بصراحة شبه تشبعنا من هالطريقة في الوعظ لدرجة صارت ما عاد تأثر فينا .. بس الكتب اللي تخاطب عقلك وتنميه وتدعم كل أفكارك وأسئلتك وتحثك على التفكر والتأمل والسؤال هذي الكتب اللي محتاجينها عشان نعرف غايتنا في الحياة ، وعشان نتغير للأفضل.
في الجزء الأول من الكتاب يتكلم جيفري عن رحلته مع القرآن باختصار تقريبا. هذا الجزء الساحر من الكتاب واللي يخليك تعيش في عالم ( مليان غيوم ) ، عالم باختصار : روحاني. هذا الجزء يحرضك على التفكير والسؤال ، يحرضك على أنو تبحث عن أجوبة مستترة في أشياء ما كنا نعطيها اهتمام. يحرضك إنك تبدأ من جديد حياتك.
الجزء الثاني بدأ يتكلم عن مشاكل وهموم المسلمين في أمريكا، المشاكل اللي تكونت من تعصب أهل الجاليات المسلمين المهاجرين الوارثين للإسلام ومع هالتعصب وانفتاح الحياة في أمريكا نشأ فجوة كبيرة بين مسلمي الجيل الثاني – الشباب – والثالث والمسجد. تكلم عن سياسة القمع لبعض شيوخ الجاليات وعن معاناة المسلمات خصوصا وتعامل الرجال معاهم في الجالية. أمور كثيرة تحدث عنها في هذا الجزء خلتني أُصاب بإحباط !!! ودي أقول له هذي المشاكل مو بس في أمريكا .. المشاكل هذي عندنا ومليانة وهي أساس مشكلتنا الحين. التهميش للعقل وفرض الافكار الموروثة بدون مناقشتها!
هذا الكتاب كنز. متأكدة راح يغير فيكم شيء كثييير وما راح اقول شيء بسيط لاني متيقنة ان التغيير بيكون كبير جدا.. وان شاء الله إيجابي .. فرصة برضو للي تعودوا نمط واحد من التفكير في الدين انهم يطلعون على الكتاب، ويحاولون يقراونه بروح التقبل ، أكيد راح يفتح لكم ابواب جميلة :).
الكتاب من تأليف جيفري لانغ. ترجمة: ابراهيم يحيى الشهابي.
الناشر: دار الفكر. موجود في مكتبة جرير بسعر 37 ريال.
407 صفحات بما فيها كلمة للناشر ومقدمة من المترجم ومقدمة للمؤلف وفصلين بعنوان:
1- ضياع ديني.
2- أين ذهب الأبناء كلهم.
في الجزء الثاني من الكتاب لي (بعض) التحفظات على بعض ما ذكره في الكتاب. والتحفظات ترجع إلى اختلاف الثقافة لا أكثر . يعني ممكن تكون مني بس.
– شيء شدني في هذا الانسان (جيفري) غير عقله وتفكيره، اللي هو قدرته الفظيعة على التحاور بأدب وهدوء. وهالشيء يظهر مع رسائل الناس اللي تسأله او حتى تشكك في القرآن . ويظهر بشكل أكبر في حواراته مع بنته بخصوص دينها واسئلتها الجريئة. فعلا إنسان معطي العقل اللي ميزنا فيه الله قيمته.
– حاولت أنقل لكم بعض من الأشياء اللي أعجبتني في الكتاب ، لاحظت إنو في النهاية بنقل كل شيء :] بس اكتفيت بعدد بسيط من الاقتباسات:
  
* إذا ما قرأت الكتاب لسا فـ : من جد لايفوتك اليوم قبل بكرا.
* الجميع في تويتر وفيس بوك اللي طلبوا رأيي في الكتاب والجميلين اللي انتظروا الريفيو، هذا البوست إهداء لكم، وكل شخص يبحث عن كتاب يغير حياته ولكل شخص يبحث عن الحقيقة .
( تم نشر المقالة كما وردت في مدونة الكاتبة دون أي تصحيح لغوي ) 
رابط المقالة http://domo3.us/blog/?p=457